Kampuang Kami

Kok nak tau jo rujak Padang
Singgahlah ka Muaro
Makan rujak minum es kuncang
Sambia mancuci mato

Anak gadih rang Payokumbuah
Manih cando galamai
Mandaki janjang ampek puluah
Makan karupuak sanjai

Pagaruyuang di Batusangka
Disinan Bundo Kanduang
Rajin-rajin rang Sungai Pua
Silungkang rang patanun

Badabua ombak di Piaman
Lamak sala lauaknyo
Bia ketek kampuang Painan
Banyak dendang dibueknyo

(Ciptaan Nuskan Sjarief, Sumbangan lirik oleh Agustoni Pasaribu)
©ourtesy of http://laguminanglamo.wordpress.com/

Pulanglah Uda

Uda kanduang dirantau urang
Pulanglah Uda di tanah Jao
Rindo lah lamo indak basuo, apo ka dayo
Lupo kok Uda jo diri denai
Sumpah jo janji maso sapayuang kito baduo

Ondeh Uda sibiran tulang
Lah tibo pulo kapa balabuah
Uda den nanti di Taluak Bayua
Ndak kunjuang tibo

Ondeh Uda pulanglah Uda

Di tanah Jao di rantau urang
Kinilah lupo (kinilah lupo) jo gadih Minang
Jan kan surek kaba barito
Denai mananti (denai mananti) jo aia mato
Malangnyo badan cinto digantuang indak batali – 2x

(Ciptaan Sjam Tanjung, Dipopulerkan oleh Hetty Koes Endang)
©ourtesy of http://laguminanglamo.wordpress.com/

Randai Cindua Mato

Dulu diutuih Cindua Mato
Etan ka Ranah Sikalawi
Pai mahanta tando mato
Tandonyo kito baputiah hati

Rajo Mudo adiak Bundo Kanduang
Baranak surang Puti Bungsu
Janji diikek sajak dibaduang
Jadi tunangan Dang Tuanku

Dek lamak tipu Imbang Jayo
Rajo kuaso di Sungai Ngiang
Bapaliang hati Rajo Mudo
Diungkai janji nan dikarang

(Ciptaan Nuskan Syarief, Dinyanyikan pertama kali oleh Lily Marlene, Dibawakan ulang oleh Tiar Ramon)
©ourtesy of http://laguminanglamo.wordpress.com/

Palai Bada

Jikok jadi Tuan ka pasa
Tolong balikan si gulo saka
Jikok tuan salero patah
Cubo makan si palai bada
Jikok tuan salero patah
Cubo makan si palai bada

Yo … palai bada, lamak rasonyo makan baduo
Yo … palai bada, lamak rasonyo makan baduo

Urang Rao pai ka danau
Ambiak rumpuik si bilang-bilang
Yo kok tuan indak picayo
Bali sabungkuih baok pulang
Yo kok tuan indak picayo
Bali sabungkuih baok pulang

Yo … palai bada, lamak rasonyo batambuah juo
Yo … palai bada, palai bada lamak rasonyo

(Ciptaan (?), Dipopulerkan oleh Lily Syarief, Elly Kasim dan Efrinon)
©ourtesy of http://laguminanglamo.wordpress.com/

Lapeh Lah Juo

Taguliciak tagurajai
Tajalopoh mo lah kironyo
Tasangkuik bujang di rantau
Dek di kampuang malapeh hao

Mandeh danga den mandeh
Ampun den pinto ka bundo kanduang
Bukan den lupo pituah mandeh
Suratan tangan mambao untuang

Lapeh dek mandeh bujang tabuang
Lieklah bulan jikok takana
Bukan mambuang lamak ka urang
Urang di kampuang pamiliah bana

Lapeh lah e lapeh lah juo
Kini badan denai

(Ciptaan (?), Dipopulerkan oleh Lily Syarief, Dibawakan ulang Fetti dan Efrinon, Sumbangan Lirik oleh Arlen Ara Guci)
©ourtesy of http://laguminanglamo.wordpress.com/

Angin Sarugo

Uda sikolah pandai murik pado gurunyo
Baradu santiang indak labiah nyo dari Uda
Jikok maota tinggi ruoknyo pado boto
Sampai ka langik kecek ndak masuak di aka

Usah mangecek lai Uda nan indak indak
Kecek takabua ndak usah dikaluakan
Dima ka mungkin kok pinjaik jadi kapak
Indak ka mungkin kok kaco ka jadi intan

Usahlah denai diredeh jo lagu India
Usah diulang kaji carito nan lamo
Dendang jo pantun co jaman Siti Nurbaya
Usah denai dihao jo angin sarugo

Uda maota punyo ameh satinggi tagak
Denai nan cameh ka mati kok diimpoknyo
Bialah denai balaki tukang garobak
Pokoknyo hati yo uda lai samo cinto

(Ciptaan Syahrul Tarun Yusuf, Dipopulerkan oleh Elly Kasim)
©ourtesy of http://laguminanglamo.wordpress.com/

Hitam Manih

Asam kandih asam balimbiang
Asam kapeh dari subarang
Hitam manih rambuik karitiang
Indak lah pueh mato mamandang

Reff:

Asam kandih asam ka pangek
Di baok dari Koto Tangah
Hitam manih jikok mangamek
Manyalinok co gulo saka
Mambuek denai harok cameh
Si hitam manih

Bukan asam sumbarang asam
Asam kapeh dari subarang
Bukan hitam sumbarang hitam
Indak pueh mato mamandang
Antah inyo alah bapunyo
Si hitam manih

Asam kandih asam balimbiang
Dalam parak banyak batangnyo
Hitam manih rambuik karitiang
Tambah rancak dek lasuang pipik dipipinyo

(Ciptaan (?), Dipopulerkan oleh Elly Kasim dan Ernie Djohan)
©ourtesy of http://laguminanglamo.wordpress.com/

Oto PLB

Oto PLB, oto nagari Lintau
Manambang ka Pakanbaru, mamuek patai jo jariang – 2x
Taragak mandeh nan den tingga marantau
Ka pulang bara ka malu, indak ciek nan tajinjiang – 2x

Reff:

Oto PLB baranti di Lubuak Bangku oi tuan
Pasisia turun singgah makan jo goreang ayam
Bia lah tandeh den kini dek parasaian oi tuan
Pado tasisiah denai di kampuang halaman

(Ciptaan (?), Dipopulerkan oleh Elly Kasim)
©ourtesy of http://laguminanglamo.wordpress.com/

Bak Cando Kanai

Ondeh …, denai lah cando kanai sijundai
Tujuah ratuih cari ramuan
Sakik nan indak namuah cegak
Antah kok tuan nan manyuokan

Alah den buang aia tampayan
Iyo dek harok hujan di langik
Iyo dek harok hujan di langik

Palito hiduik lah den padamkan
Harok cahayo di bulan sabik
Harok cahayo (ndeh …) di bulan sabik

Kini panyakik denai lah bak cando kanai
Kini panyakik denai lah bak cando kanai

Bulan sabik nan denai nanti
Kiro talampok di awan hitam
Kiro talampok (ndeh …) di awan hitam

Kini panyakik denai lah bak cando kanai
Kini panyakik denai lah bak cando kanai

(Ciptaan Masroel Mamudja, Dipopulerkan oleh Elly Kasim)
©ourtesy of http://laguminanglamo.wordpress.com/

Kanai Sijundai

Pincuran Gadiang sati lubuaknyo
Lurah dihuni urang bunian
Gunuang Singgalang ba ula nago
Jurangnyo dalam rimbo larangan

Tasabuik setan si bujang hitam
Suruhan jihin si rajo hawa
Denai nyo sentak di tangah malam
Japuik ndak dapek tunggu sabanta

Ulah tangkurak namonyo gasiang …
Datang panyakik namo sijundai …

Ulah taraso kapalo paniang
Tadanga urang maimbau denai
Raso di lurah Pincuran Gadiang
Dibaok angin nyo sayuik sampai

Asok kumayan nan lah mambubuang
Sinan nyo baka si jantuang pisang
Sairiang salak anjiang maluluang
Mangkuih ilimu si tujuah rajang

Raso ka putuih hati jo jantuang
Nyao di badan raso ka tabang
Tujuah lapisan langik den jujuang
Bumi den pijak raso tapanggang

Ulah tangkurak namonyo gasiang …
Datang panyakik namo sijundai …

Tabang marayok mamanjek dindiang
Kini malata di ateh lantai
Runtuah lah iman hati bapaliang
Kasiah nan indak dapek dilarai

Ulah tangkurak namonyo gasiang …

(Ciptaan Syahrul Tarun Yusuf, Dipopulerkan oleh Elly Kasim)
©ourtesy of http://laguminanglamo.wordpress.com/