Nan Kanduang

Jikok nak tau kito ka manyasa
Elok malah indak kito ka muaro
Ondeh nan kanduang oi

Jikok nak tau kito ka bapisah
Elok malah indak kito ko basuo
Ondeh nan kanduang oi

Tinggi lah tinggi si Gunuang Kurinci
Tampak lah nan dari simpang Koto Ranang
Ondeh nan kanduang oi

Sadiah lah bana hati rang nan pai
Padiah malah hati kami rang nan tingga
Ondeh nan kanduang oi

(Ciptaan Atmajar Idris, Dipopulerkan oleh Ian Anas)
©ourtesy of http://laguminanglamo.wordpress.com/

Taragak Pulang

Sayuik tadanga bansi gubalo
Tangiang tangih anak kanduang denai tinggakan
Manyasok rindu di dalam dado
Taragak pulang badan jauah apo kadayo

Kok isuak untuang lai ka mujua
Sabalah sayang ayah lai ka pulang juo
Kok nyampang takadia buruak nan tibo
Relakan ayah oi nak kanduang jagolah bundo

Ondeh nak kanduang sibiran tulang
Usah tagamang sarah diri ka nan kuaso
Jo cinto ayah usahlah ragu
Bumi jo langik oi nak kanduang jadi saksinyo

Sayuik tadanga bansi gubalo
Tangiang tangih anak kanduang denai tinggakan
Manyasok rindu di dalam dado
Taragak pulang badan jauah hiduik sansaro

(Ciptaan Ian Anas, Dipopulerkan oleh Ian Anas)
©ourtesy of http://laguminanglamo.wordpress.com/

Janji Dalam Rasian

Kambanglah bungo di tapi lauik
Bungo rang Tiku di tangah laman
Ndeh jago lalok badan takajuik
Janji dibuek dalam rasian

Denai nan datang yo dari jauah
Mamatiak bungo yo nan sabatang
Iyo lah mimpi sabana sungguah
Uda saurang caminan si badan denai

Adiak ka jadi si anak daro
Uda ka jadi yo kanduang marapulainyo

Dipakai suntiang yo tigo lenggek
Uda baroki diak karih di pinggang

Takekeh galak rang gaek-gaek
Denai takajuik dek malu hari lah siang
Takekeh galak rang gaek-gaek
Denai takajuik dek malu hari lah siang

(Ciptaan Rustam Raschani, Dipopulerkan oleh Ian Anas dan Elly Kasim)
©ourtesy of http://laguminanglamo.wordpress.com/

Tinggalah Denai Manangguangkan

Dek ulah cinto dek ulah cinto denai tadayo
Den sangko ameh den sangko ameh kironyo loyang
Yo pandai bana oi diak kanduang bamain raso
Kasiah den pupuak adiak tanam di ladang urang

Lai den tau pasan mandeh jo ayah kanduang
Hati jo jantuang indak namuah dibujuak lai
Dek ulah loyang nan tacinto sansaro
Tinggalah denai tinggalah denai nan manangguangkan

(Ciptaan Ian Anas, Dipopulerkan oleh Elly Kasim)
©ourtesy of http://laguminanglamo.wordpress.com/

Alek Olo

Duduak Sutan jo Marah
Tahidang nasi jo samba
Pangek lauak bakuah
Kurang tambuah batambah

Namo Sutan jo Marah
Tambuah nasi makanlah
Caro Olo yo bana
Basipangka

Reff:

Cari nan lunak
Santuang taruih
Piriang, cambuang jo pinggan
Untuak sipangka

Pangek lauak Cik Uniang
Kalio bantai Cik Angah
O badaceh bana raso
Kaik-kaik anak lidah

Tambuah satambuah lai
Cukuik sadonyo kanyang
Caro Olo badindin
Sabana sanang

(Ciptaan Syamsi Hasan, Dipopulerkan oleh Elly Kasim 1967)
©ourtesy of http://laguminanglamo.wordpress.com/

Japuiklah Denai

Ondeh ondeh, dek ulah cinto
Sansai juo kito jadinyo

Barambuih angin gunuang Singgalang
Mambaok pasan ka subarang lauik
Mamakiak ombak nan ka galombang
Hati den tingga tolonglah japuik

Reff:

Tinggi tinggi, awan bararak …
Adiak den cinto, antahlah dima, tolong carikan …
Rindu di dado, antah ka sia denai sampaikan

Hanguihlah hati taragak nak basuo
Badan bapisah yo diak di rantau urang

Pulanglah Uda, japuik tabaok
Japuiklah denai, gungguanglah tabang

Jikok Uda talambek tibo
Malang dek Uda, mungkin basuo jo tanah kuburan
Maafkan denai, pintak jo pinto usah lupokan

Ondeh ondeh, dek ulah cinto – 2x

(Ciptaan Syahrul Tarun Yusuf, Dipopulerkan oleh Elly Kasim dan Tiar Ramon)
©ourtesy of http://laguminanglamo.wordpress.com/

Indang Singguliang

Lah tarang indang lah ka dimulai
Balirik anak indang baselo
Lah tarang kasiah jolong dimulai
Sadang baitu lai putuih juo

Dirantang tangan jari mangirai
Maaf dipinto yo ka nan banyak
Tagamang badan kasiah bacarai
Raso ka taban tampek bapijak

Indang singguliang, indang singguliang
Baitu namonyo

Basabuik indang baleh mambaleh
Samakin rami nan mudo-mudo
Sayuik panggalan buliah diuleh
Tibo di kasiah apo ka dayo

Indang singguliang, indang singguliang
Baitu namonyo
Indang singguliang, indang singguliang
Indang singguliang, indang singguliang

(Ciptaan Sjamsul Arifin, Dipopulerkan oleh Elly Kasim 1963)
©ourtesy of http://laguminanglamo.wordpress.com/

Main Kim

Ka ladang mari lah ka ladang
Ka ladang batanam padi
Lok elok Tuan mamasang
Kok silap salah sandiri

Karanggo samuik nan sirah
Digaduah mangko manggigik
Kok main Tuan jan lengah
Pataba satinggi langik

Haw haw haw, tarompa kabau
Kudakak roda padati
Pek ampek kelok Maninjau
Disitu buah diisi

Diguncang batu diguncang
Diguncang sakali lai
Ti ati Tuan mamasang
Si satu jalan sandiri

Karambia satandan labek
Baminyak tangah kuali
Bapasan jo anak ketek
Si anam nan duo kali

Diguncang batu diguncang
Diguncang si jando mudo
Hei tolong si abang pasang
Pasangkan si tigo duo

Ka ladang mari lah ka ladang
Ka ladang batanam padi
Lok elok Tuan mamasang
Kok silap salah sandiri

Karanggo samuik nan sirah
Digaduah mangko manggigik
Kok main Tuan jan lengah
Pataba satinggi langik

Tatagak tonggak gantuangan
Sabaleh bilangan tangan
Si Nona jo si Noni
Basamo-samo manari

Balayia kapa main kim
Takatuang di lauiktan
Salapan duo bapilin
Salapan puluah salapan

(Ciptaan Masroel Mamudja, Dipopulerkan oleh Elly Kasim 1963)
©ourtesy of http://laguminanglamo.wordpress.com/

Ka Uda Surang

Hari nan galok, Uda den tabayang-bayang
Kini lah jauah yo dari mato
Yo sansai badan den

Ka Uda surang kasiah nan denai curahkan
Usah dicubo nak mamutuihnyo
Yo sansai bacarai

Reff:

Ijan dicubo (ndeh mandeh) marangguik kasiah jo sayang
Alah ka sansai badan den surang
Hati den ditinggakan

Ijan dicubo (ndeh mandeh) marangguik kasiah jo sayang
Alah ka sansai badan den surang
Hati den ditinggakan

(Ciptaan Masroel Mamudja, Dipopulerkan oleh Elly Kasim 1967)
©ourtesy of http://laguminanglamo.wordpress.com/

Bilo Maso Kabasuo

Den bajanji ka pai barangkek
Bapisah agak sabanta
Kini kito bajauahan tampek
Bilo maso kabasuo

Bilo den duduak bamanuang
Taragak pulang ka kampuang
Kok lai umua samo panjang
Buliah kito basuo pulo

Lah makin jauah dagang kiniko
Di rantau nasib den malang
Den takana kau jauah di mato
Bilo maso kabasuo

(Ciptaan Ramadhan Ahmad, Dipopulerkan oleh Elly Kasim 1967)
©ourtesy of http://laguminanglamo.wordpress.com/