Archive for the 'Pop 60′an' Category



Sumpah Mandeh

Marapek kapa muaro, nan di muaro
Muatan sarek suaso, ameh suaso
Mandeh manyongsong, gadang hati indak tabado
Babaka nasi bakeh anak yo nan dicinto

Sipak tarajang pambaleh jariah mandehnyo
Si Bujang Lengok durako, anak durako

Mandeh manangih badarai si aia mato
Si Bujang Lengok nan indak mambaleh guno
Nan sajak ketek digadangkan jo sansaro
Si aia susu nan dibaleh jo aia tubo

Mandeh manyumpah marantak, pinto balaku
Si Bujang Lengok tatagak manjadi batu
Manjadi batu …
Manjadi batu …

(Ciptaan Nuskan Syarief, Dipopulerkan oleh Elly Kasim)
©ourtesy of http://laguminanglamo.wordpress.com/

Ranuangkanlah

Cubo ranuangkan …

Duo tigo kuciang balari
Indak sacapek si kuciang balang
Duo tigo dapek den cari
Indak saelok Tuan nan hilang

Antahlah cubo ranuangkan – 2x

Reff:

Urang Padang maelo rantai
Rantai dielo ka Muko-muko
Sajak ketek badan marasai
Manga kok kini makin sansaro

Api-api tabang ka rimbo
Tibo di rimbo mamakan padi
Nan di hati lah lapeh juo
Apo katenggang di hati kami

Antahlah cubo ranuangkan – 2x

(Ciptaan Sjamsu Ariffin, Dipopulerkan oleh Elly Kasim, 1963)
©ourtesy of http://laguminanglamo.wordpress.com/

Sabai Nan Aluih

(Versi Oslan Husein)

Yo dek rang mudo, antah kan iyo antah kan tido
Yo dek rang mudo, usah dilatak didalam hati
Yo dek rang mudo, antah kan iyo antah kan tido
Yo dek rang mudo, maaf dimintak sapuluah jari

Iyo …,

Didanga kaba Sabai Nan Aluih
Jikok bajalan siganjua luluah
Samuik tapijak nan indak mati
Alu tataruang nan patah tigo, iyo …

Baa pulo si Sabai kini
Rambuik diguntiang co laki-laki
Jikok bajalan baralah gereang
Suko mamakai nan enteang enteang

Yo sansai, yo sansai yo

Yo dek rang mudo, antah kan iyo antah kan tido
Yo dek rang mudo, usah dilatak didalam hati
Yo dek rang mudo, antah kan iyo antah kan tido
Yo dek rang mudo, maaf dimintak sapuluah jari

[kembali ke atas]

Versi Elly Kasim klik di sini

Malapeh Hao

Timbo lai den timbo
Den timbo parik di rawang
Ibo hati den ibo
Ayam dipauik disemba alang

Reff:

Jalo balanak jalo
Udang juo nan maisi
Kao awak bakao
Urang juo nan manyudahi

Mangkudu yo buah mangkudu
Ndeh rambutan patah dahannyo
Baitu yo lah ka baitu
Nasib badan malapeh hao

Bara lah ka guruah hari
Namun bada di lauik juo
Bara lah ka rusuah hati
Namun gata digauik juo

(Ciptaan Nuskan Syarief, Dipopulerkan oleh Elly Kasim)
©ourtesy of http://laguminanglamo.wordpress.com/

Antah Lai Jadi

[Versi Gumarang]

Di Taluak Tambang kasiak badarai
Sinan tampuruang si lago tigo
Sungguah tagamang diak kasiah bacarai
Kok lai untuang batamu juo

Antah lai jadi oi, antah kok tido oi
Antah lai jadi oi, antah kok tido

Urang Silungkang rajin batanun
Rajin manyulam nan jo manjaik
Alah den ulang diak ka tukang tanuang
Banyak kironyo yo nan tarumik

Antah lai jadi oi, antah kok tido oi
Antah lai jadi oi, antah kok tido

Di Taluak Tambang kasiak badarai
Sinan tampuruang si lago tigo
Sungguah tagamang diak kasiah bacarai
Kok lai untuang batamu juo

Antah lai jadi oi, antah kok tido oi
Antah lai jadi oi, antah kok tido

Di Batusangka balantai batu
Di Parak Jua labuah basilang
Sadangnyo kapa diak lai ndak lalu
Kunun jo rakik si batang pisang

Antah lai jadi oi, antah kok tido oi
Antah lai jadi oi, antah kok tido
Antah lai jadi oi, antah kok tido oi
Antah lai jadi oi, antah kok tido

Versi Elly Kasim

Bugih Lamo

Ondeh iyo, bugih lamo, mainkanlah bugih lamo tu
Ondeh iyo, bugih lamo, mainkanlah bugih lamo tu

Hitam bakilek kudo balang
Pasangan bendi bugih lamo
Urang maliek lai sanang
Konon kok pulo urang nan punyo
Urang maliek lai sanang
Konon kok pulo urang nan punyo

Ondeh iyo, bugih lamo, mainkanlah bugih lamo tu
Ondeh iyo, bugih lamo, mainkanlah bugih lamo tu

Rami urang ka pacu kudo
Rami dek anak mudo-mudo
Tasirok darah di dado
Basobok jo jando lamo
Tasirok darah di dado
Basobok jo jando lamo

Ondeh iyo, bugih lamo, mainkanlah bugih lamo tu
Ondeh iyo, bugih lamo, mainkanlah bugih lamo tu

Kudo kancang jan dilacuik
Kok dilacuik lari manduo
Ondeh jando japuik den suruik
Den ubah parangai lamo
Ondeh jando japuik den suruik
Den ubah parangai lamo, den ubah parangai lamo

(Ciptaan Sjahriar Jusuf, Dipopulerkan oleh Elly Kasim, 1965)
©ourtesy of http://laguminanglamo.wordpress.com/

Alek Olo

Duduak Sutan jo Marah
Tahidang nasi jo samba
Pangek lauak bakuah
Kurang tambuah batambah

Namo Sutan jo Marah
Tambuah nasi makanlah
Caro Olo yo bana
Basipangka

Reff:

Cari nan lunak
Santuang taruih
Piriang, cambuang jo pinggan
Untuak sipangka

Pangek lauak Cik Uniang
Kalio bantai Cik Angah
O badaceh bana raso
Kaik-kaik anak lidah

Tambuah satambuah lai
Cukuik sadonyo kanyang
Caro Olo badindin
Sabana sanang

(Ciptaan Syamsi Hasan, Dipopulerkan oleh Elly Kasim 1967)
©ourtesy of http://laguminanglamo.wordpress.com/


Translate to

Masukkan email anda pada kotak di bawah dan klik button 'Berlangganan'. Anda akan dikirimi email untuk setiap lirik lagu yang baru tayang

Join 198 other followers

Dari Masa ke Masa


Lokasi Pengunjung

MARAWA

Dikunjungi

  • 3,266,602 orang

Follow

Get every new post delivered to your Inbox.

Join 198 other followers

%d bloggers like this: