Archive for the 'Pop 90′an' Category



Nasi Lamak Sari Kayo

Tadanga bunyi yo pupuik si batang padi
Urang manyabik di sawah barami-rami
Tuo jo mudo basamo bagadang hati
Den danga bujang jo gadih nan banyanyi
Tuo jo mudo basamo bagadang hati
Den danga bujang jo gadih nan banyanyi

Yo … yo basorak sorai bacirabuik
Iyo lamak raso sanok jo kolak pisang (sayang)
Dek ditingkah nasi lamak sari kayo

Yo … yo bahorak horai rang manyabik
Padi disabik, dihiriak, dibaok pulang (sayang)
Paubek jariah nan payah salamo ko

Ayam mancotok padinyo di tangah laman
Jamualah masiak kauiklah hari ka hujan
Padi di indang, ditumbuak di tapi tareh
Dipiliah atah tingga sajo nan bareh
Padi di indang, ditumbuak di tapi tareh
Dipiliah atah tingga sajo nan bareh
Yo … yo lah habih pupuik batang padi
Manangih bajak jo kabau dalam kandang (sayang)
Alamaik isuak kito ka sawah pulo

Yo … yo basorak sorai bacirabuik
Iyo lamak raso sanok jo kolak pisang (sayang)
Yo ditingkah nasi lamak sari kayo

(Ciptaan (?), Dipopulerkan oleh Fetty)
©ourtesy of http://laguminanglamo.wordpress.com/

Tolong Pikiakan

Ondeh …
Sacucuak sate nan dibaka
Harumnyo lapeh sampai ka pintu pasa, ondeh …
Urang mangipeh yo santiang bana
Indak babateh ujuang jo pangka
Silangkane nan pangka bala
Lah baku hampeh guliang jo banta

Usah tanyo riak jo galombang
Ambiak sampan dayuang ka tangah
Dek picayo jo kato orang
Bapisah dek asuang pitanah

Ondeh …
Sapucuak surek dari uda
Sahabih paneh kini tibo nan bana, ondeh …
Jikok ka lapeh di den ndak baa
Pado den cameh iduik jo uda
Dulu sabaleh den mambana
Kini lah tandeh uda manyasa

Dek talantuang bagageh naiak
Tajilapak tibo di laman
Lambek lansuang uda babaliak
Yo nan rancak tolong pikiakan

(Ciptaan (?), Dipopulerkan oleh Efrinon)
©ourtesy of http://laguminanglamo.wordpress.com/

Batu Nisan Mandeh

Tasintak lalok … ati ndak sanang
Tabayang mimpi nan baru lalu
Mangkonyo denai ka kampuang, ka mandeh …
Denai dapek’i halaman rumah lah rimbo …

Janjang lah rabah, pintu basaok, oh mandeh …
Den imbau mandeh indak babunyi …
Tanah tasirah, darah tasirok, oh mandeh …
Kironyo mandeh baru ka pai

Mandeh …
Manga denai ndak banantikan …
Nan den tangisi tingga batu nisan …

[kembali ke atas]

(Ciptaan (?), Dipopulerkan oleh Efrinon)
©ourtesy of http://laguminanglamo.wordpress.com/

Dendang Pasaman

Simpang Ampek Sukomananti – 2x
Padang Tujuah mangko Pinagan – 2x
Jikok dakek namuah wak pai – 2x
Baa pulo urang nan tingga – 2x

Marilah kito badendang
Oi badendang basamo-samo

Oi Pasaman gunuangnyo tinggi – 2x
Nan di Panti kuburan duo – 2x
Cando bulan tagantuang tinggi – 2x
Kok dinanti bilo jatuahnyo – 2x

Marilah kito banyanyi
Oi banyanyi basamo-samo

Ujuang Gadiang jambatan gantuang – 2x
Kawek tarantang ka subarang – 2x
Santiang bana akanyo buruang – 2x
Jarek urang nyo baok tabang – 2x

Marilah kito manari
Oi manari basamo-samo
Marilah kito banyanyi
Oi banyanyi basamo-samo
Marilah kito badendang
Oi badendang basamo-samo

(Ciptaan Tiar Ramon, Dipopulerkan oleh Tiar Ramon)
©ourtesy of http://laguminanglamo.wordpress.com/

Nasib Juo

Gadang-gadang yo mamak kayu di rimbo
Sikaduduak babunyi danguang badanguang
Kayu jati batimba jalan
Rantiangnyo ka kayu api

Kadang-kadang yo mamak hati paibo
Dima duduak yo diri sinan tamanuang
Mandeh mati bapak bajalan
Bamulo sansainyo diri

Lai dunsanak nan kanduang
Lai bamamak di kampuang
Tagah dek bansaik pulo
Apo ka dayo

Dek ameh indak dikanduang
Badan batulak jo untuang
Jatuah diimpok tanggo
Larek jadinyo

Ondeh … mak oi
Sansaro ditingga mandeh
Ondeh mak, sansaro dek hati juo

(Ciptaan (?), Dipopulerkan oleh Fetty)
©ourtesy of http://laguminanglamo.wordpress.com/

Indak Mungkia Janji

Tumbuah … tumbuah kopi dalam parak
Tumbuah maraok ka batang palo
Sungguah hati yo taragak
Ka bakeh uda nan denai cinto – 2x

Reff:

Buah … buah sampelo masak di batang
Balah duo makan jo santan
Dek untuang denai alun lah sanang
Rindu ka uda denai tahankan – 2x

Babunyi saluang tangah malam
Bunyinyo baibo-ibo
Tabayang uda di ruang mato …
Mato nan indak talalokkan …

Cameh mandayo dalam hati
Takuik uda baraliah kasiah
Duduak basandiang jo urang lain …
Sio-sio panantian

Angin … angin malam baoklah pasan
Tolong bisiakkan ka kasiah denai
Usah ragu jo cinto denai
Denai nan indak mungkia jo janji – 2x

(Ciptaan (?), Dipopulerkan oleh Efrinon)
©ourtesy of http://laguminanglamo.wordpress.com/

Baganti Pasangan

Dek ulah salero juo, dek ulah salero juo
Alah gaek baganti juo pasangan
Dek ulah salero juo, dek ulah salero juo
Alah gaek baganti juo pasangan

Tak tak tak tontong, tak tontong kalamai jaguang
Tagunda kacambuang basi, tagunda kacambuang basi
Jikok daulu, daulu balaki ajuang
Kini jo tukang padati, kini jo tukang padati

Lubuak Bagaluang Lubuak Buayo
Kayu Kalek jo Kayu Tanam – 2x
Alah binguang yo anak-anak nyo
Caliak gaek baganti pasangan – 2x

Tak tak tak tontong, tak tontong kalamai jaguang
Tagunda kacambuang basi, tagunda kacambuang basi
Daulu anak (yo anak) babapak kanduang
Kiniko babapak tiri, kiniko babapak tiri

Alah ditabang batang surian
Kayunyo kareh rononyo sirah – 2x
Usah anak nan uni salahkan
Jikok lah jarang pulang ka rumah – 2x

Usah anak nan disalahkan
Jikok lah jarang pulang ka rumah
Usah anak nan disalahkan
Jikok lah jarang pulang ka rumah

Tak tak tak tontong, tak tontong kalamai jaguang
Tagunda kacambuang basi, tagunda kacambuang basi
Dulu balaki jo urang suko bamanuang
Nan kini suko baganyi, nan kini suko baganyi

Babelok jalan nak ka Matua
Lapeh nan dari Koto Tuo – 2x
Antah malang antah kok mujua
Abak surang kini baduo – 2x

(Ciptaan (?), Dipopulerkan oleh Elly Kasim)
©ourtesy of http://laguminanglamo.wordpress.com/

Mambaleh Jaso

Rami lah rami pasa rang Tiku
Rami dek anak ondeh urang Malampah
Lah panjang kini ruehnyo tabu
Usahlah lupo yo lupo jo jaso tanah
Lah panjang kini ruehnyo tabu
Usahlah lupo yo lupo jo jaso tanah

Reff:

Banyak diliek, banyak tajadi
Urang nan kurang mambaleh jaso
Dek ulah paneh yo nan sahari
Lah lupo kacang nan jo kuliknyo

Sapuluah langkah jalan ka muko
Dikana juo (ondeh) salangkah nan tingga
Bapikia panjang itu biaso
Padonyo isuak yo isuak badan manyasa
Bapikia panjang itu biaso
Padonyo isuak yo isuak badan manyasa

(Ciptaan (?), Dipopulerkan oleh Elly Kasim)
©ourtesy of http://laguminanglamo.wordpress.com/

Larek di Rantau

Oi uda nan den cinto …
Lah lamo uda di rantau
Bilo juo ka pulang …
Hati rasah yo dek manantikan

Oi adiak nan den sayang …
Bukan den tak namuah pulang
Baa nak manyubarang …
Biduak lai bapandayuang tidak

Rindu ka adiak nan denai cinto
Uda sayang lakehlah pulang
Ramuak hati dalam bacinto
Siang jo malam tabayang-bayang

Oi uda nan den cinto …
Ibolah ka diri denai ko
Indak tahan rasonyo …
Untuak bapisah salamo nangko

Oi adiak nan den sayang …
Taguahkan iman di dado
Nyampang denai tak pulang …
Tandonyo larek di rantau urang

Maafkan sajo diri denai ko
Usah baitu uda bakato
Marilah kito samo bado’a
Kok untuang isuak batamu juo

(Ciptaan (?), Dipopulerkan oleh Fetty dan Yan Juned)
©ourtesy of http://laguminanglamo.wordpress.com/

Tinggalah Sayang

Tinggalah tinggalah sayang
Tinggalah denai ko kapai
Santano denai ndak pulang
Usahlah denai ditangisi

Reff:

Marapi jo Singgalang
Alam Minangkabau
Salamaik tingga sayang
Denai ka marantau

Kok mujua babaliak pulang
Kok malang bakubua di rantau
Do’akan denai ko sayang
Salamaik denai ko di rantau

(Ciptaan (?), Dipopulerkan oleh Yan Juned)
©ourtesy of http://laguminanglamo.wordpress.com/


Translate to

Masukkan email anda pada kotak di bawah dan klik button 'Berlangganan'. Anda akan dikirimi email untuk setiap lirik lagu yang baru tayang

Join 186 other followers

Dari Masa ke Masa


Lokasi Pengunjung

MARAWA

Dikunjungi

  • 2,880,337 orang

Follow

Get every new post delivered to your Inbox.

Join 186 other followers

%d bloggers like this: