Posts Tagged 'Melati'

Baalah Kasudahannyo

Ondeh … baalah kasudahannyo …

Ondeh, kayu kalek … kayu kalek madang di lurah …
Iyo diambiak ka tunggak langkan … – 2x
Ondeh, hati lakek … hati lakek pandang lah sudah …
Tagah dek pandai mahilangkan … – 2x

Ondeh, batang salak … batang salak di Pakan Satu …
Ambiak sarantiang baok pulang … – 2x
Ondeh, haram talak … haram talak ambo kok tau …
Bak raso tuan di tangan urang … – 2x

Ondeh, sarikayo … sarikayo makan jo tapai …
Taratai tumbuah di tapian … – 2x
Ondeh, bialah … di dunia kasiah ndak sampai …
Di akhiraik tuan ambo nantikan … – 2x

Ondeh … baalah kasudahannyo …

(Ciptaan Zulkarnaen, Dipopulerkan oleh Melati)
©ourtesy of http://laguminanglamo.wordpress.com/

Tambang Arek

Rami galanggang ndeh diak oi di Batusangka
Manang lah kudo ondeh diak kanduang ei balam birugo – 2x
Buah nan masak ndeh diak oi manjadi mangka
Putiak babaliak ondeh diak kanduang ei manjadi bungo – 2x

Koto Gadang ndeh tuan Ranah Balingka
Koto rang Guguak ondeh tuan denai Tabek Sarojo – 2x
Buah nan masak ndeh tuan indak ka mangka
Asa lai pandai ondeh tuan denai nan mamaramnyo – 2x

Jan cameh ondeh diak oi
Asa pandai nan mamaramnyo
Jan cameh ondeh diak oi
Asa pandai nan mamaramnyo

Balam timbago ndeh diak oi pasang karatan
Bao bapikek ondeh diak kanduang ei malah dahulu – 2x
Guruah kok indak ndeh diak oi ka jadi hujan
Bumi jo langik ondeh diak kanduang ei ka dapek malu – 2x

Hari patang ndeh tuan matohari turun
Dagang batulak ondeh tuan denai yo ka kampuangnyo – 2x
Guruah bacinto ndeh tuan hujan nak turun
Awan di langik ondeh tuan denai yo mahambeknyo – 2x

Ondeh diak oi apo dayo
Tambang arek di nan punyo
Ondeh diak oi apo dayo
Tambang arek di nan punyo

(Ciptaan Zulkarnaen, Dipopulerkan oleh Zulkarnaen dan Melati)
©ourtesy of http://laguminanglamo.wordpress.com/

Sagalo Jikok

Si kapa di Taluak Bayua
Balampu taruih puncaknyo
Kok kabau pandai batalua
Yo bara lah ka buruak, ka buruak onggok congkongnyo – 2x

Reff:

Dikaji jikok yo sanak sagalo jikok
Jikok nan kokok yo kokok tingga di ayam
Batamu ongok yo sanak basamo ongok
Nan kaluak paku yo sanak batambah kalam

Si pado di Pasa Matua
Manjua bilih kadainyo
Kok kudo pandai basiua
Yo bara lah ka monyong, ka monyong cibia muncuangnyo – 2x

(Ciptaan Zulkarnaen, Dipopulerkan oleh Melati)
©ourtesy of http://laguminanglamo.wordpress.com/

Nenek Nonton Pilem India

Tadi malam nenek nonton pilem India
Kok lakonnyo Rekha Purno nan jo Shakila
Yo manonton ondeh urang yo rami bana
Sampai tarompa nenek tatingga di lua

Pilem main, nenek nonton ndeh asik bana
Ndeh sadiah nenek nangih taisak-isak
Nenek eboh yo dek lakon malampang nona
Nyo marabo yo berang, rami basorak

Batambah sibuik si nenek
Nyo sabuik santiang jo ampek
Lampu iduik yo rami urang maliek

Makin manggilo si nenek
Sampai kurisi nyo angkek
Kiro nyo cari giginyo nan talompek

[kembali ke atas]

(Ciptaan Zulkarnaen, Dipopulerkan oleh Melati)
©ourtesy of http://laguminanglamo.wordpress.com/

Cubo Mamujuak

Ondeh upiak, yo upiak rambahlah paku
Tumbuah di lereng, di lereng yo pandakian
Ondeh upiak, manga jo kau dek tagak di situ
Ndeh sajak cako, sajak cako kau den nantikan

A jo lai nan kau manuangkan
A jo lai nan kau pikiakan
Sagoni pitih den asiangkan
Apo kandak kau den balikan

Urang Sanjai, Rang Sanjai manjua karupuak
Lah takato sampai ka ujuang nagari
Ondeh anti lamak, hati lah cubo mamujuak
Kanalah untuang, kanalah untuang badan diri

Kok manutua si rumpun salak
Jan kanai si bungo paik
Elok ambua-i lah sayak
Patungkek sajo lah panjaik

Rami lah Pasa Bukiktinggi
Rami manjalang pukua limo
Orok sopan denai abihi
Talarang bana di agamo

Maco banamo maco aji
Dimakan jo samba lado
Kok yo lai mandanga kaji
Sarawa sampik abihi pulo

(Ciptaan Zulkarnaen, Dipopulerkan oleh Melati dan Zulkarnaen)
©ourtesy of http://laguminanglamo.wordpress.com/

Bagurau

Yo nan lah lamo (hai hai) indak ka rimbo
Batambah tunggang (hai hai) lah pandakian
Yo nan lah lamo oi tuan indak lah basuo
Barubah kolak ei tuan yo pamandangan

Batambah tunggang (hai hai) lah pandakian
Diruntuah hujan (hai hai) lah tangah hari
Patuik barubah ondeh diak oi lah pamandangan
Lah manarik bana ondeh diak oi lah denai kini

Anak lah urang (hai hai) di Koto Tuo
Ka balai sadang (hai hai) lah tangah hari
Indak lah salah ei tuan pandangan mato
Lah batambah gapuak ei tuan denai pandangi

Lapeh nan dari (hai hai) Tanjuang Ampalu
Tagak di lereng (hai hai) lah pandakian
Indak lah patuik ondeh diak kanduang bak itu
Lah nyato sansai ondeh diak oi lah badangakan (jan berang da)

Baranti oto (hai hai) di Sarilamak
Handak manjalang (hai hai) di Tanjuang Pati
Awak bagurau ei tuan lah samo awak
Tasingguang jo galak ei tuan yo dihabisi

(Ciptaan Zulkarnaen, Dipopulerkan oleh Melati dan Zulkarnaen)
©ourtesy of http://laguminanglamo.wordpress.com/

Den Sangko

Yo nan di urang sibuli-buli – 2x
Hai nan jan nyo den lah boto bana – 2x
Di urang sayang hai ka pauji
Hai nan jan nyo den lah iyo bana
Di urang sayang hai ka pauji
Hai nan jan nyo den lah iyo bana

Reff:

Bukik lah tinggi tanahnyo tinggi – 2x
Ngarainyo dalam, kalo bakalo – 2x
Mangkonyo denai tagak mauji
Sayang kanduang baparo-paro
Mangkonyo denai tagak mauji
Sayang kanduang baparo-paro

Den sangko kariang hai tabuang minyak – 2x
Kapuran kambang hai jo saoknyo – 2x
Den sangko gariang hai ikan jinak
Buayo gadang hai mah kironyo
Den sangko gariang hai ikan jinak
Buayo gadang hai mah kironyo

(Ciptaan Zulkarnaen, Dipopulerkan oleh Melati dan Zulkarnaen)
©ourtesy of http://laguminanglamo.wordpress.com/


Translate to

Masukkan email anda pada kotak di bawah dan klik button 'Berlangganan'. Anda akan dikirimi email untuk setiap lirik lagu yang baru tayang

Join 192 other followers

Dari Masa ke Masa


Lokasi Pengunjung

MARAWA

Dikunjungi

  • 3,140,984 orang

Follow

Get every new post delivered to your Inbox.

Join 192 other followers

%d bloggers like this: