Putiak Manjadi Buah

Tasirok darah dalam lamunan
Tabayang ranah nan ditinggakan
Dalam lalok jadi rasian …
Tangiang dendang si ombak Padang
Tingkah batingkah jo kulik alang
Raso bapasan maimbau pulang …

Ondeh tapian sanangkan hati …
Usah tagamang usahlah cameh
Mangko dihadang lautan sati
Arok piagam tulisan ameh …

Kok jauah bana badan kiniko
Nan hati di ranah juo …
Nak makin tagok kaki malangkah
Ei sanak tolong jo doa …

Baniah kok lai manjadi padi
Basaba dulu mananti … sanak …
Putiak kok lai manjadi buah
Diganggam arek arangan …

Oi … tolong jo doa nak putiak manjadi buah …

Ondeh tapian sanangkan hati …
Usah tagamang usahlah cameh
Mangko dihadang lautan sati
Arok piagam tulisan ameh …

Nan denai cari salamo lareh
Digungguang dibaok pulang …
Ka panaruko ameh di darek
Paukia rumah nan gadang …

Baniah kok lai manjadi padi
Basaba dulu mananti … sanak …
Putiak kok lai manjadi buah
Diganggam arek arangan …

Oi … tolong jo doa nak putiak manjadi buah …
Oi … tolong jo doa nak putiak manjadi buah …
Manjadi buah …
Manjadi buah …

(Ciptaan (?), Dipopulerkan oleh Santi Nuskan)
©ourtesy of http://laguminanglamo.wordpress.com/

Pondok Nan Lamo

Kok den kana pondok den nan lamo
Sangkek den dulu dilahiakan
Tapancia tasisiah jauah dari mato
Di sinan den dilahiakan …

Sajak ketek denai lah diaja
Ka sawah, ka ladang jo ka rimbo …
Manggaro, manyabik, mairiak jo manuai …
Di sinan den digadangkan …

Kini lah jauah, jauah dari mato
Pondok den nan lamo …
Ayah, mandeh, dunsanak kawan kasadonyo …
Kini jauah di mato …

Kini lah jauah, jauah dari mato
Pondok den nan lamo …
Ayah, mandeh, dunsanak kawan kasadonyo …
Kini jauah di mato … – 3x

[kembali ke atas]

(Ciptaan Nuskan Syarief, Dipopulerkan oleh Santi Nuskan, kemudian oleh Young Patapayan)
©ourtesy of http://laguminanglamo.wordpress.com/

Rakena

Rumah Gadang di Bukiktinggi
Nan di lamannyo tatagak lumbuang (ohoi)
Alah tasabuik sajak dulunyo
Yo badatak bana di dalam hati
Taraso niaik indak ka lansuang (ohoi)
Tagak dek adiak nan kareh juo

Jikok lah indak yo rakena karano murai
Indak lah bondo yo rakena mambuek sarang (oi)
Kok indak uda nan dulunyo yo nan mamulai
Indak lah denai ondeh uda ka mabuak surang

Di Maninjau jalan bakelok
Jaleh tampaknyo Nagari Bayua (ohoi)
Taruihkan jalan ka Lubuak Sao
Asa baniaik yo ka nan elok
Di dalam hujan cubolah jamua (ohoi)
Baju nan basah ka kariang juo

Usahlah denai yo rakena diagiah baju
Baju nan lamo yo rakena tak tasaruangkan (oi)
Usahlah denai ondeh uda diagiah malu
Malu nan lamo ondeh uda tak tatangguangkan (oi)

Unggeh lah paku yo rakena tabang ka paku
Tibo di paku yo rakena lah tabang pulo (oi)
Jikok katuju yo rakena samo katuju
Lamo jo lambek yo rakena ka jadi juo (oi)

(Ciptaan (?), Dipopulerkan oleh Herry Tanjung dan Renima)

Ka Jadi Apo

Santi sayang, jikok gadang ka jadi apo?
Jadi bidan, jadi SH, ka jadi doto?
Indak jauah aia jatuah dari cucuran
Ayah koncek tantu anak jadi garundang

Oi bijak, manjawek iyo sabana bijak
Rang gaek Santi oi, jan dipagarahkan
Nak sayang oi upiak urang ka bakeh awak
Nan bana kato nan ka dikatokan

Santi sayang, jikok gadang ka jadi apo?
Jadi bidan, jadi doto, tasarah bundo
Nan paralu jadi anak mambaleh guno
Nan ka jadi bagai duo ampek kakinyo

Oi bijak, manjawek iyo sabana bijak
Rang gaek Santi oi, jan dipagarahkan
Nak sayang oi upiak urang ka bakeh awak
Nan bana kato nan ka dikatokan

Nan paralu jadi anak mambaleh guno
Nan ka jadi bagai duo ampek kakinyo – 3x

(Ciptaan (?), Dipopulerkan oleh Santi Nuskan, Elly Kasim dan Yan Bastian)
©ourtesy of http://laguminanglamo.wordpress.com/

Tabayang Kampuang

Kok tabayang Ranah Minang nan den cinto
Taratak jo tapian tampek mandi …
Di kelok pandakian, tadanga bunyi ganto
Malenggok kabau maelo padati …

Indak taraso aia mato balinang
Sayuik-sayuik tadanga bunyi saluang …
Ondeh kampuang halaman, nagari nan den cinto
Lamo lambek kito ka basuo …

Ondeh urang dirantau, kok lah dapek nan dicari
Pulanglah bangun kampuang jo nagari …

Indak taraso aia mato balinang
Sayuik-sayuik tadanga bunyi saluang
Ondeh kampuang halaman, nagari nan den cinto
Lamo lambek kito kabasuo …

[kembali ke atas]

(Ciptaan Nuskan Syarief, Dipopulerkan oleh Santi Nuskan)
©ourtesy of http://laguminanglamo.wordpress.com/

Rilakan

Lahia lah denai ka ateh dunia
Hiduik jo mati taruhan bundo
Tangih jo rengek sagalo timpo
Bundo tarimo jo lapang dado

Reff:

Bapisah malah kironyo
Gadang di rantau si anak bundo
Maadu untuang di ranah urang
Do’a bundo tangiang juo

Rilakan … denai rilakan …
Aia susu nan denai makan
Rilakan … denai rilakan …
Aia susu nan denai makan

(Ciptaan (?), Dipopulerkan oleh Santi Nuskan)
©ourtesy of http://laguminanglamo.wordpress.com/

Sarawa Panjang

Mano Mande den sayang
Balikan sarawa panjang
Santi taragak pulo
Model nan maleo-leo

Reff:

Santi jan banyak kandak
Pitih tingga pambali bareh
Cubo mintak ka abak
Kok lai nan balabiah

Apo guno basarawa panjang
Sampai maleo-leo Santi
Abak kini sabana takantang
Jan banyak kandak juo

Iyo pentang kamari pentang
Iyo bedo kamari bedo
Jikok kain … panjang saheto

Iyo pentang kamari pentang
Iyo bedo kamari bedo
Talampok kaki … nampak kapalo

(Ciptaan (?), Dipopulerkan oleh Santi Nuskan tahun 70′an, Sumbangan lirik oleh Ijoenk)
©ourtesy of http://laguminanglamo.wordpress.com/

Si Leki

Si leki itu namo anak anjiang mak itam
Si leki bulunyo hitam putiah balang-balang
Si leki inyo suko manggaduah anak ayam
Nan sadang asik mancari makan

Tampak dek induak ayam si leki dicotoknyo
Si leki kasakitan mangadu ka induaknyo
Tampak dek induak ayam si leki dicotoknyo
Si leki kasakitan mangadu ka induaknyo

(Ciptaan (?), Dipopulerkan oleh Santi Nuskan, Sumbangan lirik oleh Taufiq)
©ourtesy of http://laguminanglamo.wordpress.com/

Baraja Bajalan

Ta..ta..tah, Ta..ta. tah
Ta tah adiak den ta tah
Bapacik arek-arek diak
Hati hati malangkah

Ta..ta..tah, Ta..ta. tah
Usah taburu buru
Jikok adiaklah panek diak
Baranti malah daulu

Alah malangkah adiak den kini
Jikok bajalan ta oyong oyong
Isuak kok pandai adiak balari
Kito bamain sipak tekong

(Ciptaan (?), Dipopulerkan oleh Santy Nuskan 1977, Sumbangan lirik oleh Inyiak Darwas Ibrahim)
©ourtesy of http://laguminanglamo.wordpress.com/

Anak Gubalo

Di kaki bukik
Sawah tabantang
Angin babisiak
Sungai banyanyi

Kami bamain
Ateh pamatang
Ayah jo bundo
Batanam padi

Dari jauah
Tadanga bunyinyo suliang
Sayuik sayuik
Diambuih anak gubalo

(Ciptaan (?), Dipopulerkan oleh Santi Nuskan, Sumbangan Lirik Oleh Inyiak Darwas Ibrahim)
©ourtesy of http://laguminanglamo.wordpress.com/