Ranah Pasisia

Painan Ranah Pasisia
Ondeh … Ranah Pasisia …
Painan Ranah Pasisia
Ondeh … Ranah Pasisia …

Dek ulah sayuik tadorong kasiah
Hai badan lah kuruih, ondeh lah kanduang kasudahannyo
Ondeh … Ranah Pasisia …

Dek ulah sayuik tadorong kasiah
Hai badan lah kuruih, ondeh lah kanduang kasudahannyo
Ondeh … Ranah Pasisia …

Tarusan nak Urang Bayang
Ondeh … Ranah Pasisia …
Tarusan nak Urang Bayang
Ondeh … Ranah Pasisia …

Dek ulah kasiah tadorong sayang
Hai baa lah jadinyo, sansaro badan kasudahannyo
Ondeh … Ranah Pasisia …

Dek ulah kasiah tadorong sayang
Hai baa lah jadinyo, sansaro badan kasudahannyo
Ondeh … Ranah Pasisia …

(Gamad Klasik, Dinyanyikan oleh Yen Rustam)
©ourtesy of http://laguminanglamo.wordpress.com/

Tanjuang Aua

Tanjuang lah Aua di baruah Tabiang
Mudiak Nagari Koto Panjang
Tanjuang lah Aua di baruah Tabiang
Mudiak Nagari Koto Panjang

Bialah hancua tulang jo dagiang, tulang jo dagiang
Budi nan baiak tak kunjuang hilang
Bialah hancua tulang jo dagiang, tulang jo dagiang
Budi nan baiak tak kunjuang hilang

Tanjuang lah Aua Lubuak Minturun
Rami balainyo Lubuak Buayo
Tanjuang lah Aua Lubuak Minturun
Rami balainyo Lubuak Buayo

Bakabek bana padi jo daun, padi jo daun
Sarok jarami tasisiah juo
Bakabek bana padi jo daun, padi jo daun
Sarok jarami tasisiah juo

(Gamad Klasik, Dinyanyikan oleh Yen Rustam)
©ourtesy of http://laguminanglamo.wordpress.com/

Tanjuang Bila

Tanjuang Bila Muaro Karang
Tampak Rang Bugih sadang manjalo
Tanjuang Bila Muaro Karang
Tampak Rang Bugih sadang manjalo

Bukannyo ameh intan bakarang
Hiasan diri budi bahaso
Bukannyo ameh intan bakarang
Hiasan diri budi bahaso

Urang manjaik nan manjalujua
Ambo manjaik nan salah banang
Urang manjaik nan manjalujua
Ambo manjaik nan salah banang

Budi nan baiak baso katuju
Bialah bansaik dipandang urang
Budi nan baiak baso katuju
Bialah bansaik dipandang urang

Rantau Singkawang

Dari Singkawang ka Amuntai, aduhai lah nasib …
Karajo rodi di jaman parang
Dari Singkawang ka Amuntai, aduhai lah nasib …
Karajo rodi di jaman parang

Sudahlah nasib …
sudahlah nasib diri marasai, aduhai lah nasib
Tabuang badan bilo ka pulang
Tabuang badan bilo ka pulang

Rantau Singkawang di Kalimantan, aduhai lah nasib …
Banyak rang Jao karajo tambang
Rantau Singkawang di Kalimantan, aduhai lah nasib …
Banyak rang Jao karajo tambang

Batimpo sakik …
Batimpo sakik dek parasaian, aduhai lah nasib
Suratan diri kironyo malang
Suratan diri kironyo malang

(Gamad Klasik, Dinyanyikan oleh Yen Rustam)
©ourtesy of http://laguminanglamo.wordpress.com/

Buruang Putiah

Buruang putiah tabang sakawan
Tabang ka dahan masuak ka rimbo
Buruang putiah tabang sakawan
Tabang ka dahan masuak ka rimbo

Aduhai …
Alang padiahnyo ditingga tuan
Kamari pai ondeh dunsanak yo surang sajo
Buruang lah putiah …
Kamari pai yo surang sajo

Buruang lah putiah tabang nyo malam …

Buruang putiah tabang sakawan
Tabang maraok ka dalam samak
Buruang putiah tabang sakawan
Tabang maraok ka dalam samak

Aduhai …
Bialah kini ditingga tuan
Pado ditikam, pado ditikam kato rang banyak
Buruang lah putiah …
Pado ditikam kato rang banyak

Buruang lah putiah tabang nyo malam …

(Gamad Klasik, Dinyanyikan oleh Yen Rustam)

©ourtesy of http://laguminanglamo.wordpress.com/

Hujan Lah Turun Pulo

Hujan hujan lah turun pulo
Dingin taraso ka dalam dado
Banta jo guliang bakapik juo

Sudahlah dingin badan sabatang
Rindu hati den surang
Uda dinanti tak kunjuang datang

Denai dimabuak surang
Dingin dingin dingin

Tabayang kisah kito nan lamo
Garah jo cakak kito baduo
Yo hujan labek mamadu cinto

Maso batuka musim baganti
Kisah bak cando mimpi
Rindu manyeso di dalam hati

Bapisah kito kini
Dingin dingin dingin

Reff:

Kilek langik patuih babunyi
Tasintak den dalam mimpi
Oi malang sadang disayang den ditinggakan

Lapeh tali nan lah tajalin
Kawan madok ka urang lain
Bintang hilang hujan nan datang

Hitam batambah hitam
Oi malang sudah kalam ditimpo hujan
Dingin jo dingin laruik ka tulang

Nan bedo dimabuak surang
Ohoi mato lalok tak namuah
Ohoi angan malayang jauah

Hujan hujan camehnyo hati
Lai den tau dimanyo kini
Lah jaleh kawan mungkia jo janji
Bapisah malah kasudahannyo

Linang tangih di pipi
Luko manyeso di dalam hati
Hujan bilo kabaranti
Dingin dingin dingin

(Ciptaan Chilung Ramali, Dipopulerkan pertama kali oleh Endang S Taurina, Dibawakan ulang oleh Yen Rustam, Sumbangan Lirik oleh Arlen Ara Guci)
©ourtesy of http://laguminanglamo.wordpress.com/

KM Kurinci

Mandaki janjang KM Kurinci
Bak cando gontai langkah di kaki
Barangkek sayang si jantuang hati

Kareh badanyuik jantuang jo hati
Sairiang linang tangih di pipi
Den lapeh kasiah barangkek kini

Babunyi pupuik KM Kurinci
Pakiak bunyinyo nan tigo kali
Raso nyo jujuik kasiah di hati

Lamonyo kapa puta kamudi
Bialah tanang malaju pasti
Barangkek kasiah balayia kini

Bialah sauah kini tagantuang
Takabek rantai di sisi lambuang
Kasiah balayia dibaok untuang

Bialah jauah tinggakan kampuang
Jikok di rantau hiduik baruntuang
Jan lupokan kami di kampuang

Reff:

Kok lai ado sumua di ladang
Buliahlah kito manumpang mandi
Kok lai ado umua panjang
Buliahlah kito batamu lai

(Ciptaan Chilung Ramali, Dinyanyikan pertama kali oleh Lily Marlene, Dibawakan ulang oleh Yen Rustam, Sumbangan Lirik oleh Arlen Ara Guci)
©ourtesy of http://laguminanglamo.wordpress.com/

Hiduik di Rantau Subarang

Tapana hati di pasia putiah, lamunan tinggi ka langik
Sasayuik mato mamandang, lautan laweh mambantang
Jauah di kaki langik, oi di baliak awan
Di sinan den di lahiakan, di manjo yo di sayang

Tangiang juo yo di talingo carito nan den dangakan
Hiduik di nagari urang nan bagalimang cahayo
Mangko den marantau, oi tinggalah kampuang
Tagadai sawah jo ladang baka di rantau urang

Tingga kulik pambaluik tulang
Badan kuruih rasaki malang
Dapek pagi habihnyo patang

Sakik sakiklah surang
Imbau imbau tido nan datang
Badan sansai tingga sabatang

Hiduik di rantau urang malang di runduang malang
Hiduik di rantau subarang

(Ciptaan Chilung Ramali, Pertama kali didendangkan Jamal Mirdad, lalu dibawakan ulang oleh Endang S Taurina, Lily Marlene, Yen Rustam, Sumbangan Lirik oleh Arlen Ara Guci)
©ourtesy of http://laguminanglamo.wordpress.com/