Archive for October, 2010

Nan Bagala

Apo gala nyo rambuik?
Iyo bagala si ika mayang
Gala urang panakuik?
Nan bagala si gadang kalang

Apo gala nyo bibia?
Iyo bagala merah dalimo diak
Apo gala rang andia?
Hei tagiah gilo lah pado kayo

Apo gala nyo pipih?
Iyo bagala pauah dilayang
Apo gala nyo Siti?
Kok bajalan suko malenggang

Apo gala nyo sunguik?
Iyo bagala si sunguik kawek
Ndak elok urang pambuduik
Jikok pambuduik lakeh lah gaek

Gala si bulu mato?
Iyo bagala samuik bairiang
Gala pandai karajo?
Iyo nan suko panggatok jariang

Apo gala nyo badia?
Iyo bagala badia bilalan
Tasingguang jan lah bangih
Mari kito samo badendang

Versi Lain
Continue reading ‘Nan Bagala’

Advertisements

Indak Den Sangko

Indak disangko, indak disangko, si tabuang niro …
Ambiak lah rantiang, ambiak lah rantiang pangabek kain
Indak den sangko, indak den sangko, bak cando iko …
Adiak nan surang, adiak nan surang cari nan lain

Lah tagerai candonyo padi
Katan lah lupo jo puluiknyo
Lah paneh candonyo hari
Kacang lah lupo jo kuliknyo

Reff:

Usah pauikkan, usah pauikkan, si kabau jalang …
Ambiak lah pandan, ambiak lah pandan jo bungo lado
Usah turuikkan, usah turuikkan bak kato urang …
Binaso badan, binaso badan kasudahannyo

Lah tagerai candonyo padi
Katan lah lupo jo puluiknyo
Lah paneh candonyo hari
Kacang lah lupo jo kuliknyo

(Ciptaan (?), Dipopulerkan oleh Gumarang)
©ourtesy of https://laguminanglamo.wordpress.com/

Kue Dokok Dokok

Kue kue, dokok dokok
Lapek bugih, lapek baru, kue
Lamang, kue lampar, kue koci
Kue kue …

Jikok malam kami bajojo
Urang lalok kami nan jago juo
Mancari makan sanak sudaro
Kue kue …, kue kue …

Cubolah hai cubo oi kawan sadonyo
Iyo sabana sero dimakan baduo
Ciek lai sadang, banyak abih juo
Nan mambali sanang kami balabo

Kue kue, dokok dokok
Lapek bugih, lapek baru, kue
Lamang, kue lampar, kue koci
Kue kue …

Jikok malam kami bajojo
Urang lalok kami nan jago juo
Mancari makan sanak sudaro
Kue kue …, kue kue …

Cubolah hai cubo oi kawan sadonyo
Iyo sabana sero dimakan baduo
Ciek lai sadang, banyak abih juo
Nan mambali sanang kami balabo

Kue kue, dokok dokok
Lapek bugih, lapek baru, kue
Lamang, kue lampar, kue koci
Kue kue …, kue kue …, kue kue …

(Ciptaan Yusaf Rahman, Dipopulerkan oleh Gumarang)
©ourtesy of https://laguminanglamo.wordpress.com/

Nasib Sawahlunto

[Versi Gumarang]

Dari tapian ka Sawahlunto (kanduang)
Sawahlunto bukik barantai
Parasaian badan, parasaian badan sarupo iko
Sarupo iko … (kanduang) – 2x
Baitu lah dagang nan sansai – 2x

Balari lari bukannyo kijang (kanduang)
Pandan tasanda di tapian
Kami yo lah banyanyi, kami yo banyanyi bukannyo girang
Bukannyo riang … (kanduang) – 2x
Badan takana untuang jo bagian – 2x

Kubang Sirakuak ba Kayu Aro (kanduang)
Tanam lado di tapi ngarai
Untuang badan kami, untuang badan kami sarupo iko
Sarupo iko … (kanduang) – 2x
Baitu lah dagang nan sansai – 3x

Versi Anas Yusuf

Laruik Malam

[Versi Gumarang]

Lah laruik malam … 3x

Dangalah lagu rang panggaleh, rang panggaleh
Bajojo lapek tangah malam, tangah malam
Bialah pipik nak nyo lapeh, nak nyo lapeh
Asa baganti jo buruang balam
Bialah pipik nak nyo lapeh, nak nyo lapeh
Asa baganti jo buruang balam

Reff:

Oi dingin oi hari yo lah laruik … 2x
Lah laruik malam … 3x

Lamang jo lampar sarikayo, sarikayo
Bagulo anau batangguli, batangguli
Indak den harok jo nan kayo, jo nan kayo
Bialah bansaik asa babudi
Indak den harok jo nan kayo, jo nan kayo
Bialah bansaik asa babudi

Oi dingin oi hari yo lah laruik … 2x
Lah laruik malam … 3x

Versi Elly Kasim

Denai Sansai

Jikok den kaka, si daun paku …
Jatuah lah badarai, sibungo lado …
Yo lah sansai yo badan oi -2x

Jikok den kana maso dahulu …
Jatuah lah badarai, si aia mato …
Yo lah sansai yo badan oi -2x

Makan cubadak, baulam manggih …
Manggih dimakan dalam parahu …
Yo lah sansai yo badan oi -2x

Di lua galak di dalam tangih …
Indak ka ado, urang nan tau …
Yo lah sansai yo badan oi -2x

(Ciptaan Sofyan Naan, Dipopulerkan oleh Anas Yusuf – Orkes Gumarang, Sumbangan lirik oleh Lies Marlysa Ramali)
©ourtesy of https://laguminanglamo.wordpress.com/

Ondeh Yo Niang

[Versi Gumarang]

Sinangi yo lauak rang Tiku yo niang
Yo diatua nan di ujuang pandan – 2x
Ondeh yo niang, hmm hmm

Manangih lah tagak di pintu yo niang
Malapeh urang ka bajalan – 2x
Ondeh yo niang, hmm hmm

Batang Kapeh yo dari Subarang yo niang
Rang Kurinci nak singgah ka Sago – 2x
Ondeh yo niang, hmm hmm

Lah putiah mato dek mamandang yo niang
Nan dinanti indak kunjuang tibo – 2x
Ondeh yo niang, hmm hmm

Balayia yo ka Bangkahulu yo niang
Nak balabuah yo tantang nan dalam – 2x
Ondeh yo niang, hmm hmm

Kasiah adiak sahinggo itu …
Manga di kami mangko mandalam – 2x
Ondeh yo niang, hmm hmm

Versi Inggrid Michelle


Translate to

Masukkan email anda pada kotak di bawah dan klik button 'Berlangganan'. Anda akan dikirimi email untuk setiap lirik lagu yang baru tayang

Join 271 other followers

badendang™

Dari Masa ke Masa


Lokasi Pengunjung

MARAWA

Dikunjungi

  • 7,223,228 orang

%d bloggers like this: