Archive for October, 2011

Ganto Padati

Iyo iyo lah iyo iyo
Iyokan pulo lah si bangiyo

Hari nan sadang manjalang parak siang
Antaronyo pukua ampek pukua limo
Lalok sanang antaro talayang-layang
Di talingo raso bunyi nyariang ganto

Danguah dagah padati nan baru tibo
Ibo hati mandangakan bunyi ganto
Bunyi ganto bairiang jo enggak kabau
Raso bunyi urang jauah nan maimbau

Reff:

Antah ganto baparindu bapakasiah
Antah jihin antah mambang malapari
Dibaok lalok mato tak namuah lai
Dibaok duduak hati kian tagisia

Sajak mandangakan nyo si bunyi ganto
Haram saketek tak sanang paratian
Takana lai takatokan nyo tido
Bak si bisu tagana jo barasian

(Ciptaan Zulkarnaen, Dipopulerkan oleh Zulkarnaen)
©ourtesy of https://laguminanglamo.wordpress.com/

Advertisements

Malayu Kopi Daun

Hilia banda lah mudiak banda
Bujang mamapeh di muaro
Tamaik bana bujang sikola
Masuak karajo susah pulo

Ka Piaman tasabuik ajo
Nan manjinjiang sarang tampuo
Masuak bana bujang karajo
Tiok bulan tautang juo

Reff:

Hei … Malayu, Malayu minum kopi daun
Hei … Malayu, Malayu minum kopi daun
Lalala lalala lalala – 2x
Lalala lalala lalala – 2x

Anak bujang gubalo jawi
Nyo tapauik di bangka jambu
Abih bulan tarimo gaji
Jikok utang tibo manunggu

Tarang bulan nan di muaro
Bujang bagiah karjo manyanyi
Gaji sabulan tingga saparo
Induak bareh alah baganyi

Hei … Malayu, Malayu minum kopi daun
Hei … Malayu, Malayu minum kopi daun
Lalala lalala lalala – 2x
Lalala lalala lalala – 2x

(Ciptaan (?), Pop Gamad 70-an, Dipopulerkan oleh Yan Juned)
©ourtesy of https://laguminanglamo.wordpress.com/

Putiak Manjadi Buah

Tasirok darah dalam lamunan
Tabayang ranah nan ditinggakan
Dalam lalok jadi rasian …
Tangiang dendang si ombak Padang
Tingkah batingkah jo kulik alang
Raso bapasan maimbau pulang …

Ondeh tapian sanangkan hati …
Usah tagamang usahlah cameh
Mangko dihadang lautan sati
Arok piagam tulisan ameh …

Kok jauah bana badan kiniko
Nan hati di ranah juo …
Nak makin tagok kaki malangkah
Ei sanak tolong jo doa …

Baniah kok lai manjadi padi
Basaba dulu mananti … sanak …
Putiak kok lai manjadi buah
Diganggam arek arangan …

Oi … tolong jo doa nak putiak manjadi buah …

Ondeh tapian sanangkan hati …
Usah tagamang usahlah cameh
Mangko dihadang lautan sati
Arok piagam tulisan ameh …

Nan denai cari salamo lareh
Digungguang dibaok pulang …
Ka panaruko ameh di darek
Paukia rumah nan gadang …

Baniah kok lai manjadi padi
Basaba dulu mananti … sanak …
Putiak kok lai manjadi buah
Diganggam arek arangan …

Oi … tolong jo doa nak putiak manjadi buah …
Oi … tolong jo doa nak putiak manjadi buah …
Manjadi buah …
Manjadi buah …

(Ciptaan (?), Dipopulerkan oleh Santi Nuskan)
©ourtesy of https://laguminanglamo.wordpress.com/

Mupakaik Karo

Dangakan kawan o lagu mupakaik karo
Cadiaknyo malam o kawan binguangnyo siang
Hari lah hujan o kawan kumpua basamo
Takana pondok yo pondok nan ndak baurang
Hari lah hujan oi kawan duduak basamo
Takana pondok yo pondok nan ndak baurang

Baru lah malam oi kawan banyak pangana
Iko jo iten yo kawan banyak dikana
Ayam bakukuak yo mandeh hari lah siang
Pangana cadiak yo kawan baransua hilang
Ayam bakukuak yo mandeh hari lah siang
Pangana cadiak yo kawan baransua hilang

Reff:

Kok hari siang pangana hilang
Duduak tamanuang cando kuciang tuo
Jikoknyo malam lah mulai datang
Pikiran binguang lah cadiak pulo

Ondeh dunsanak yo kawan dangakan kato
Usah ditiru, ditiru mupakaik karo
Jikok tatiru, tatiru sabana bedo
Alamaik badan yo badan nan ka sansaro
Jikok tatiru, tatiru sabana bedo
Alamaik badan yo badan nan ka sansaro

(Ciptaan (?), Dipopulerkan oleh Asben)
©ourtesy of https://laguminanglamo.wordpress.com/

Buruang Bondo

Hiduik den kini oi umpamo buruang diak
Jikok ka tabang sayok kini lah senteang
Mukasuik hati handak tabang mambubuang diak
Manampak padi nan masak di lereang gunuang

Sayok maradai, maradai baa ka tabang
Padi nan masak, nan masak takana juo …
Kamano badan oi badan den ka batenggang
Tiado kawan oi kawan maraso ibo

Hiduik den kini oi umpamo buruang diak
Jikok ka tabang sayok kini lah senteang
Mukasuik hati handak tabang mambubuang diak
Manampak padi nan masak di lereang gunuang

Reff:

Banduang ratoknyo si unggeh bondo
Ka bakeh sia ka mintak tolong
Takana lai takato tido
Padi nan masak disabik urang

Maratok hati di dalam badan
Sayok nan senteang ka dipangakan
Duduak tamanuang di ateh dahan
Tapaso paruah nan basangkuikkan

Baitu bana oi nasib nan malang diak
Duduak bamanuang, bamanuang mangana untuang
Takana dulu samaso pandai tabang diak
Tabang mambubuang bagurau samo gadang

(Ciptaan (?), Dipopulerkan oleh Asben)
©ourtesy of https://laguminanglamo.wordpress.com/

Buntiang Kuciang

Hei … coiko bana mandapek bini si buntiang kuciang
Laki bajalan kok ndak dibaok, inyo berang-berang
Sagalo kandaknyo kok ndak dibari inyo marabo
Apo nan dapek dibaekan ka bakeh lakinyo

Buntiang kuciang kato rang tuo …
Sabana manyeso bakeh lakinyo …

Kok untuang baiak dapek laki sayang ka inyo
Apo dibueknyo namun lakinyo sayang juo
Kok untuang malang dapek laki urang parabo
Bini manganduang marauang-rauang kanai sipaknyo

Hei … coiko bana mandapek bini si buntiang kuciang
Laki bajalan kok ndak dibaok, inyo berang-berang
Sagalo kandaknyo kok ndak dibari inyo marabo
Apo nan dapek dibaekan ka bakeh lakinyo

Buntiang kuciang kato rang tuo …
Sabana manyeso bakeh lakinyo …

(Ciptaan (?), Dipopulerkan oleh Asben)
©ourtesy of https://laguminanglamo.wordpress.com/

Talak Tigo

Indak kato den, iyo juo katonyo
Indak sagan lah jo mintuo
Lah den caraikan talak tigo

Dikatokan salah, indak dikatokan salah
Awak pai badendang, katonyo pai manggata
Badendang tangah malam, den pulang pagi hari
Pitih nan den cari, untuak ka anak bini

Indak kato den, iyo juo lah katonyo
Indak sagan lah jo mintuo
Lah den caraikan talak tigo

Hei hei hei …, hei hei …, hei
Indak kato den, iyo juo lah katonyo
Iko lah susahnyo dapek bini pancimburu buto
Inyo ndak mancubo baa raso manjadi jando
Indak ibo jo anak-anak, lah den caraikan talak tigo

Indak kato den, iyo juo lah katonyo
Indak sagan lah jo mintuo
Lah den caraikan talak tigo

Sungguah malangnyo untuang si tukang dendang
Kok lagu kito lamak, hati urang pun sanang
Kok urang ndak katuju, kapalo nan kanai langkang
Awak pulang ka rumah, bini pun berang-berang

Indak kato den, iyo juo katonyo
Indak sagan lah jo mintuo
Lah den caraikan talak tigo

(Ciptaan (?), Dipopulerkan oleh Asben)
©ourtesy of https://laguminanglamo.wordpress.com/


Translate to

Masukkan email anda pada kotak di bawah dan klik button 'Berlangganan'. Anda akan dikirimi email untuk setiap lirik lagu yang baru tayang

Join 270 other followers

badendang™

Dari Masa ke Masa


Lokasi Pengunjung

MARAWA

Dikunjungi

  • 7,058,970 orang

%d bloggers like this: