Archive for the 'Pop 60’an' Category



Pandeka Tengkak

Dangalah pulo kawan-kawan
Carito nangko elok-elok
Ado pandeka dahulunyo
Pandeka tengkak nan batungkek

Uli Gadolo namo cakonyo
Tengkak maso jadi parewa
Kini pandeka usah disabuik
Ganggang sapadi mambunuah juo

Dongkak pamulo rabah batigo
Tungkek Gadolo manyemba-nyemba
Lah banyak lari ka dalam rimbo
Uli Gadolo taruih mangaja

Hari Salasa sadang balai
Tajadi heboh yo di pakan
Maliang jo rampok ka manyamun
Urang manggaleh bapakiak-an

Pakiak bajadi kalebuik ampok
Canang babunyi disauik tontong
Ladiang jo rembeh kilek bakilek
Untuang Gadolo capek tibonyo

Dongkak pamulo rabah batigo
Tungkek Gadolo manyemba-nyemba
Lah banyak lari ka dalam rimbo
Uli Gadolo taruih mangaja

Rampok lah lari tunggang langgang
Ado nan tangga sarawanyo
Kapalo rampok lah tajongkang
Anak buahnyo lah mahilang

Tungkek di suok di kida sakin
Mambuek rampok indak badayo
Kini Gadolo lah duduak pulo
Sambia mangguluang daun nipahnyo

(Ciptaan Masroel Mamudja, Dipopulerkan oleh Elly Kasim)
©ourtesy of https://laguminanglamo.wordpress.com/

Ratok Tangih

Apo diharok dek tukang dendang
Laruik kok Uda dek manantikan – 2x
Biduak nan tirih usah ditompang
Denai ndak usah Uda nantikan – 2x

Ratok jo tangih hati nan patah
Usahlah Uda basadiah juo
Bialah badan lai kabapisah
Sanangkan hati pai jo urang

Lapuak lah janji dek parasaian
Bakarek rotan kasiah jadinyo – 2x

Putuihlah tali di pasambuangan
Patah bacinto badan cilako – 2x

(Ciptaan Syahrul Tarun Yusuf , Dipopulerkan oleh Elly Kasim)
©ourtesy of https://laguminanglamo.wordpress.com/

Sumpah Mandeh

Marapek kapa muaro, nan di muaro
Muatan sarek suaso, ameh suaso
Mandeh manyongsong, gadang hati indak tabado
Babaka nasi bakeh anak yo nan dicinto

Sipak tarajang pambaleh jariah mandehnyo
Si Bujang Lengok durako, anak durako

Mandeh manangih badarai si aia mato
Si Bujang Lengok nan indak mambaleh guno
Nan sajak ketek digadangkan jo sansaro
Si aia susu nan dibaleh jo aia tubo

Mandeh manyumpah marantak, pinto balaku
Si Bujang Lengok tatagak manjadi batu
Manjadi batu …
Manjadi batu …

(Ciptaan Nuskan Syarief, Dipopulerkan oleh Elly Kasim)
©ourtesy of https://laguminanglamo.wordpress.com/

Ranuangkanlah

Cubo ranuangkan …

Duo tigo kuciang balari
Indak sacapek si kuciang balang
Duo tigo dapek den cari
Indak saelok Tuan nan hilang

Antahlah cubo ranuangkan – 2x

Reff:

Urang Padang maelo rantai
Rantai dielo ka Muko-muko
Sajak ketek badan marasai
Manga kok kini makin sansaro

Api-api tabang ka rimbo
Tibo di rimbo mamakan padi
Nan di hati lah lapeh juo
Apo katenggang di hati kami

Antahlah cubo ranuangkan – 2x

(Ciptaan Sjamsu Ariffin, Dipopulerkan oleh Elly Kasim, 1963)
©ourtesy of https://laguminanglamo.wordpress.com/

Sabai Nan Aluih

(Versi Oslan Husein)

Yo dek rang mudo, antah kan iyo antah kan tido
Yo dek rang mudo, usah dilatak didalam hati
Yo dek rang mudo, antah kan iyo antah kan tido
Yo dek rang mudo, maaf dimintak sapuluah jari

Iyo …,

Didanga kaba Sabai Nan Aluih
Jikok bajalan siganjua luluah
Samuik tapijak nan indak mati
Alu tataruang nan patah tigo, iyo …

Baa pulo si Sabai kini
Rambuik diguntiang co laki-laki
Jikok bajalan baralah gereang
Suko mamakai nan enteang enteang

Yo sansai, yo sansai yo

Yo dek rang mudo, antah kan iyo antah kan tido
Yo dek rang mudo, usah dilatak didalam hati
Yo dek rang mudo, antah kan iyo antah kan tido
Yo dek rang mudo, maaf dimintak sapuluah jari

[kembali ke atas]

Versi Elly Kasim klik di sini

Malapeh Hao

Timbo lai den timbo
Den timbo parik di rawang
Ibo hati den ibo
Ayam dipauik disemba alang

Reff:

Jalo balanak jalo
Udang juo nan maisi
Kao awak bakao
Urang juo nan manyudahi

Mangkudu yo buah mangkudu
Ndeh rambutan patah dahannyo
Baitu yo lah ka baitu
Nasib badan malapeh hao

Bara lah ka guruah hari
Namun bada di lauik juo
Bara lah ka rusuah hati
Namun gata digauik juo

(Ciptaan Nuskan Syarief, Dipopulerkan oleh Elly Kasim)
©ourtesy of https://laguminanglamo.wordpress.com/

Antah Lai Jadi

[Versi Gumarang]

Di Taluak Tambang kasiak badarai
Sinan tampuruang si lago tigo
Sungguah tagamang diak kasiah bacarai
Kok lai untuang batamu juo

Antah lai jadi oi, antah kok tido oi
Antah lai jadi oi, antah kok tido

Urang Silungkang rajin batanun
Rajin manyulam nan jo manjaik
Alah den ulang diak ka tukang tanuang
Banyak kironyo yo nan tarumik

Antah lai jadi oi, antah kok tido oi
Antah lai jadi oi, antah kok tido

Di Taluak Tambang kasiak badarai
Sinan tampuruang si lago tigo
Sungguah tagamang diak kasiah bacarai
Kok lai untuang batamu juo

Antah lai jadi oi, antah kok tido oi
Antah lai jadi oi, antah kok tido

Di Batusangka balantai batu
Di Parak Jua labuah basilang
Sadangnyo kapa diak lai ndak lalu
Kunun jo rakik si batang pisang

Antah lai jadi oi, antah kok tido oi
Antah lai jadi oi, antah kok tido
Antah lai jadi oi, antah kok tido oi
Antah lai jadi oi, antah kok tido

Versi Elly Kasim


Translate to

Masukkan email anda pada kotak di bawah dan klik button 'Berlangganan'. Anda akan dikirimi email untuk setiap lirik lagu yang baru tayang

Join 222 other followers

badendang™

Dari Masa ke Masa


Lokasi Pengunjung

MARAWA

Dikunjungi

  • 4,049,368 orang

Follow

Get every new post delivered to your Inbox.

Join 222 other followers

%d bloggers like this: