Posts Tagged 'Chilung Ramali'

Pangganti Dirinyo

Dek cinto yo dek dicinto juo
Tacinto nan lah bapunyo
Di situ mangkonyo tabedo
Basabab cinto nan buto
Disitu mangkonyo sansaro

Reff:

Apo juo kini nan ditangih tangisi juo
Badan juo beko nan ka batambah sansaro

Mangkonyo ditangih tangisi juo
Basabab ulah patah bacinto
Disitu mangkonyo taibo
Kama ka dicari kagantinyo
Disitu mangkonyo tabedo

Apo juo kini nan ditangih tangisi juo
Denai datang kini ka pangganti dirinyo

(Ciptaan Chilung Ramali, Dipopulerkan oleh Lily Syarief)
©ourtesy of https://laguminanglamo.wordpress.com/

Bulan Tarang

Bulan lan bulannyo tarang
Lan lan cahayo bakilek
Jaman man jaman sakarang
Urang gaek balomba jo anak ketek

Bulan lan bulannyo gadang
Lan lan cahayo kulabu
Jaman man jaman sakarang
Amai biai mamakai calak jo gincu

Reff:

Tarang tarang bulan tarang
Tarangnyo tarang lareh
Ikolah jaman sakarang
Gadang ketek samo tageh

Bulan lan bulannyo gadang
Lan lan warnonyo kuniang
Jaman man jaman sakarang
Tuo mudo bapacu sigadu santiang

(Ciptaan Chilung Ramali, Dipopulerkan oleh Elly Kasim, 1974)
©ourtesy of https://laguminanglamo.wordpress.com/

Hujan Lah Turun Pulo

Hujan hujan lah turun pulo
Dingin taraso ka dalam dado
Banta jo guliang bakapik juo

Sudahlah dingin badan sabatang
Rindu hati den surang
Uda dinanti tak kunjuang datang

Denai dimabuak surang
Dingin dingin dingin

Tabayang kisah kito nan lamo
Garah jo cakak kito baduo
Yo hujan labek mamadu cinto

Maso batuka musim baganti
Kisah bak cando mimpi
Rindu manyeso di dalam hati

Bapisah kito kini
Dingin dingin dingin

Reff:

Kilek langik patuih babunyi
Tasintak den dalam mimpi
Oi malang sadang disayang den ditinggakan

Lapeh tali nan lah tajalin
Kawan madok ka urang lain
Bintang hilang hujan nan datang

Hitam batambah hitam
Oi malang sudah kalam ditimpo hujan
Dingin jo dingin laruik ka tulang

Nan bedo dimabuak surang
Ohoi mato lalok tak namuah
Ohoi angan malayang jauah

Hujan hujan camehnyo hati
Lai den tau dimanyo kini
Lah jaleh kawan mungkia jo janji
Bapisah malah kasudahannyo

Linang tangih di pipi
Luko manyeso di dalam hati
Hujan bilo kabaranti
Dingin dingin dingin

(Ciptaan Chilung Ramali, Dipopulerkan pertama kali oleh Endang S Taurina, Dibawakan ulang oleh Yen Rustam, Sumbangan Lirik oleh Arlen Ara Guci)
©ourtesy of https://laguminanglamo.wordpress.com/

KM Kurinci

Mandaki janjang KM Kurinci
Bak cando gontai langkah di kaki
Barangkek sayang si jantuang hati

Kareh badanyuik jantuang jo hati
Sairiang linang tangih di pipi
Den lapeh kasiah barangkek kini

Babunyi pupuik KM Kurinci
Pakiak bunyinyo nan tigo kali
Raso nyo jujuik kasiah di hati

Lamonyo kapa puta kamudi
Bialah tanang malaju pasti
Barangkek kasiah balayia kini

Bialah sauah kini tagantuang
Takabek rantai di sisi lambuang
Kasiah balayia dibaok untuang

Bialah jauah tinggakan kampuang
Jikok di rantau hiduik baruntuang
Jan lupokan kami di kampuang

Reff:

Kok lai ado sumua di ladang
Buliahlah kito manumpang mandi
Kok lai ado umua panjang
Buliahlah kito batamu lai

(Ciptaan Chilung Ramali, Dinyanyikan pertama kali oleh Lily Marlene, Dibawakan ulang oleh Yen Rustam, Sumbangan Lirik oleh Arlen Ara Guci)
©ourtesy of https://laguminanglamo.wordpress.com/

Tanjuang Pariuak

Tinggalah Tanjuang Pariuk labuhan kapa
Denai barangkek ka pulang usah disasa

Dek marasai badan di rantau
Taraso kampuang maimbau
Dek marasai badan di rantau
Taraso kampuang maimbau

Reff:

Pandanglah anak subarang
Kini ka barangkek pulang
Lapehkan jo kasiah sayang
Nak dapek den jalang-jalang

Tanjuang Pariuk labuhan
Nan indak ka denai lupokan
Tanjuang Pariuk labuhan
Nan indak ka denai lupokan

Tinggalah oi tinggalah sayang
Lapehkanlah denai nak pulang
Tinggalah oi tinggalah sayang
Lapehkanlah denai nak pulang

(Ciptaan Chilung Ramali, Dipopulerkan oleh Eva Noerdin 1974, Sumbangan Lirik oleh Inyiak Darwas Ibrahim)
©ourtesy of https://laguminanglamo.wordpress.com/

Hiduik di Rantau Subarang

Tapana hati di pasia putiah, lamunan tinggi ka langik
Sasayuik mato mamandang, lautan laweh mambantang
Jauah di kaki langik, oi di baliak awan
Di sinan den di lahiakan, di manjo yo di sayang

Tangiang juo yo di talingo carito nan den dangakan
Hiduik di nagari urang nan bagalimang cahayo
Mangko den marantau, oi tinggalah kampuang
Tagadai sawah jo ladang baka di rantau urang

Tingga kulik pambaluik tulang
Badan kuruih rasaki malang
Dapek pagi habihnyo patang

Sakik sakiklah surang
Imbau imbau tido nan datang
Badan sansai tingga sabatang

Hiduik di rantau urang malang di runduang malang
Hiduik di rantau subarang

(Ciptaan Chilung Ramali, Pertama kali didendangkan Jamal Mirdad, lalu dibawakan ulang oleh Endang S Taurina, Lily Marlene, Yen Rustam, Sumbangan Lirik oleh Arlen Ara Guci)
©ourtesy of https://laguminanglamo.wordpress.com/


Translate to

Masukkan email anda pada kotak di bawah dan klik button 'Berlangganan'. Anda akan dikirimi email untuk setiap lirik lagu yang baru tayang

Join 262 other followers

badendang™

Dari Masa ke Masa


Pengunjung Terbaru

Ahadi on Laruik di Rantau
Hendrik on Kampuang Nan Jauah di Mato
nure on Badindin
nure on Badindin
saidi faiz on Pulang Marantau
hatta on Ayam den Lapeh
updateku on Lompong Sagu
ZUL on Kaparinyo

Lokasi Pengunjung

MARAWA

Dikunjungi

  • 6,590,262 orang

%d bloggers like this: