Posts Tagged 'Waty Yusuf'

Ranah Balingka

Ranah Balingka …, dilingkuang bukik Gunuang Singgalang
Di Batu Tagak …, pai ka Gaduang nan naiak oto
Indak den sasa …, bia basakik di rantau urang
Badan ka pulang …, pado di kampuang baputiah mato

Oo sansai …, tadanga saluang sayuik maimbau
Ibolah hati …, mangana untuang manimpo diri
Oo sansai …, acok tamanuang denai di rantau
Ibolah hati …, tabayang kampuang nan ditangisi

Tinggalah kampuang …, jorong nan tigo Ranah Balingka
Jorong Pahambatan …, Koto Hilalang nan jo Subarang
Oi mandeh kanduang …, pintak jo pinto tolong jo do’a
Salamaik badan …, salamaik badan babaliak pulang

[kembali ke atas]

(Ciptaan Syahrul Tarun Yusuf, Dipopulerkan oleh Waty Yusuf)
©ourtesy of https://laguminanglamo.wordpress.com/

Dangalah Minang Maimbau

Rang rantau … (rang rantau pulanglah baa …)

Danga lah danga mak Minang maimbau …
Tanyo batanyo Gunuang Marapi ka Gunuang Singgalang (ndeh … mak)
Urang rantau antah bilo lah ka pulang mak …
Hanguih hati dek rindu nan jo taragak … – 2x

Reff:

Tinggi yo tinggi … tabang
Si buruang bangau … (ondeh si buruang bangau …)
Lubuak mananti … tingga
Jo hati risau … (iyo jo hati risau …)

Kok sampai hilang … sayang
Sanak di rantau (ondeh …)
Maratok bumi …
Manyasa Alam Minangkabau (rang rantau pulanglah baa …)

Kok sampai hilang … sayang
Sanak di rantau (ondeh …)
Maratok bumi …
Manyasa Alam Minangkabau …

(Ciptaan (?), Dipopulerkan oleh Waty Yusuf)
©ourtesy of https://laguminanglamo.wordpress.com/

Pulang ka Anak Mamak

Kamanakan mamak kok indak tatapam bana kami dek mamak
Suruah urang kok lai tatapam bana kami dek urang …

Reff:

Oi sayang mamak kamanakan mamak
Yo elok rupo sabana rancak
Kok anak mamak dipandang tacelak
Yo kaduonyo tipak di mamak

Siriah yo pulang yo ka gagangnyo
Pinang lah ka tampuaknyo
Dari Sikumbang pulang ka Koto
Dijapuik dek bakonyo

Ibaraik kuah talenggang ka nasi
Tantu yo lamak dimakan kanyang
Anak batuah minantu babudi
Tipak di mamak juo nan kasanang

Kamanakan mamak kok indak tatapam bana kami dek mamak
Suruah urang kok lai tatapam bana kami dek urang …

(Ciptaan (?), Dipopulerkan oleh Waty Yusuf)
©ourtesy of https://laguminanglamo.wordpress.com/

Samo Bajanji

Adiak … (uda …)

Reff:

Lapehlah adiak … (yo uda …)
Denai kapai …
Basaba adiak … (yo uda …)
Den tuntuik ilmu di rantau urang

Tenggang dek uda … (yo adiak …)
Denai mananti … (hmm …)
Yo surek uda … (yo adiak …)
Kaba barito ka pupuak cinto

Samo bajanji …, hiduik sa-mati …
Cinto nan suci …, samo dinanti …

Pailah uda … (tingga … lah sayang)
Tamaik sikola … (lakeh … den pulang)
Mukabua do’a … (ondeh …)
Nasibnyo cinto Tuhan Kuaso – 2x

Adiak … (uda …)

(Ciptaan (?), Dipopulerkan oleh Waty Yusuf & Andy Mulya)
©ourtesy of https://laguminanglamo.wordpress.com/

Si Adiak Kanduang

Barabuik patang jo sanjo mangaja galok
Hilangnyo galok ukatu lah laruik malam
Tangah malam manateh talua dalam songkok
Manciok-ciok bunyinyo si anak ayam

Reff:

Sambilan bulan (ndeh …) mandeh manganduang
Darah taserak (ndeh …) manyiram bumi
Azan tadanga (ndeh …) tando si buyuang
Lahia lah adiak balahan diri

Mandeh …, malang sungguah nasibnyo si adiak kanduang
Dari ketek lah gadang nan dek sansaro
Mandeh …, nan marusuah dima nyo si ayah kanduang
Lamo jo lambek marantau ka pulang juo – 2x

(Ciptaan (?), Dipopulerkan oleh Waty Yusuf)
©ourtesy of https://laguminanglamo.wordpress.com/

Tasaru Dalam Mimpi

Badantiang hujan di malam tibo
Raso tadanga urang maimbau
Tasirok darah rasonyo uda lah pulang
Den tasaru dalam mimpi

Reff:

Sairiang hujan si aia mato
Bayangan uda mambuek risau
Maratok darah yo darah di dalam tulang
Manyasak rindu di hati

Dulu samaso uda kapai
Nan den mintak kaba barito
Yo surek uda ka pupuak janji

Sumpah nyo cinto saputiah hati
Denai indak bapaliang muko
Antah kok uda nan mamuloi – 2x

(Ciptaan (?), Dipopulerkan oleh Waty Yusuf)
©ourtesy of https://laguminanglamo.wordpress.com/

Musim Haji

Tibo maso musim haji
Itu Rukun Islam ka-limo
Rami cando tanah suci
Rami umaik sagalo bangso

Bulan Dzulhijjah umaik Allah
Yo naiak haji ka Makah
Karano Allah nan disambah
Umaik Islam turuik parintah

Reff :

Yaa Muslimin yaa Muslimat
Salamaik pulang jo pai
Lahia batin jo akhiraik
Salam salamaik naiak haji

Di dunia banyak dicari
Ibadaik camin sarugo
Takadia kandak Illahi
Islam ndak pandang suku jo bangso

Yaa Muslimin yaa Muslimat
Salamaik pulang jo pai
Lahia batin jo akhiraik
Salam salamaik naiak haji

(Ciptaan (?), Dipopulerkan oleh Waty Yusuf)
©ourtesy of https://laguminanglamo.wordpress.com/


Translate to

Masukkan email anda pada kotak di bawah dan klik button 'Berlangganan'. Anda akan dikirimi email untuk setiap lirik lagu yang baru tayang

Join 262 other followers

badendang™

Dari Masa ke Masa


Lokasi Pengunjung

MARAWA

Dikunjungi

  • 6,449,040 orang

%d bloggers like this: