Posts Tagged 'Young Patapayan'

Balada Anak SMA

Lah tamaik buyuang sikola
Lah manarimo ijazah
Disangko lah cukuik ilmu …
Ditutuik pena jo buku

Didanga kaba di kota
Di sinan sagalo lai
Bamodal ijazah SMA
Karajo pun dicari

Digadai sawah nan jo ladang
Untuak baka ka pai bajalan
Si buyuang ka parantauan

Payah dicari karajo di kota
Banyak pangangguran sarjana
Konon pulo anak SMA

Malamar karajo kantua
Lowongan katonyo panuah
Karajo syaratnyo tinggi
Paliang kurang ado koneksi

Ijazah lah batundak-tundak
Lamaran lah kanai tulak
Badan jo kaki nan lah bangkak
Karajo alun juo nampak

Tadanga bunyinyo saluang
Si buyuang takana kampuang
Marasai di parantauan …
Oi buyuang lakehlah pulang

Di kampuang sadang paguno
Elok bangun nagari kito
Marapi Singgalang sadonyo …
Manantikan buyuang tibo

Digadai sawah nan jo ladang
Untuak baka ka pai bajalan
Si buyuang ka parantauan

Payah dicari karajo di kota
Banyak pangangguran sarjana
Konon pulo anak SMA

Badan lah dijilek ari
Hujan paneh dijalani
Manere-nere kian kamari
Karajo alun juo pasti

Sipatu alah mangango
Saroman muncuang buayo
Dicari kamano-mano
Karajo alun juo ado

(Ciptaan (?), Dipopulerkan oleh Young Patapayan)
©ourtesy of https://laguminanglamo.wordpress.com/

Advertisements

Minang Malang Minang Sayang

Ondeh … cubo ranuangkan dek sanak
Batang sikaduduak nan lah manyamak, yo manyamak …
Iyo lah marimbo jalan madok kalua …
Ondeh … kok rumpuik kini lah lalang
Lah maijau lumuik tumbuah di janjang rumah gadang …
Urang nan pai alun juo nak pulang …

Reff:

Hujan ameh di rantau urang ndak kunjuang datang …
Hujan tangih jo aia mato bakapanjangan …
Hiduik mangakeh dapeknyo pagi habihnyo patang …
Lah basitandeh sanak alun juo nak pulang …

Ondeh … lah langang nagari kito
Namun rang bujang banyak nan pai marantau cino …
Malang kampuang den, Minang malang disayang …
Malang kampuang den, Minang malang disayang … – 2x

(Ciptaan (?), Dipopulerkan oleh Young Patapayan)
©ourtesy of https://laguminanglamo.wordpress.com/

Tabali Lado Pagi

Di hari pakan denai balanjo
Urang lah ramo denai barago
Dek takuik abih ka dapek lado
Den bali juo tigo ungguak sajo

Di kampuang dek takuik indak dapek bini
Di rantau sajo malah den pajadi
Wakatu pulang den bai malagak
Eh Gadih Minang rancak-rancak indak banyak kandak

Kironyo onggok patang batambah gadang
Manyasa denai mambali tadi pagi
Urang pancameh hiduik tagamang
Bakcando urang tabali lado pagi

Ka berang awak sia nan ka disasa
Dibali dek takuik lado ka maha
Ma tangguak rapek, sagalonyo dapek
Batandiang cadiak, nan manang lah tambuah juo …

[kembali ke atas]

(Ciptaan (?), Dipopulerkan oleh Young Patapayan)
©ourtesy of https://laguminanglamo.wordpress.com/

Pondok Nan Lamo

Kok den kana pondok den nan lamo
Sangkek den dulu dilahiakan
Tapancia tasisiah jauah dari mato
Di sinan den dilahiakan …

Sajak ketek denai lah diaja
Ka sawah, ka ladang jo ka rimbo …
Manggaro, manyabik, mairiak jo manuai …
Di sinan den digadangkan …

Kini lah jauah, jauah dari mato
Pondok den nan lamo …
Ayah, mandeh, dunsanak kawan kasadonyo …
Kini jauah di mato …

Kini lah jauah, jauah dari mato
Pondok den nan lamo …
Ayah, mandeh, dunsanak kawan kasadonyo …
Kini jauah di mato … – 3x

[kembali ke atas]

(Ciptaan Nuskan Syarief, Dipopulerkan oleh Santi Nuskan, kemudian oleh Young Patapayan)
©ourtesy of https://laguminanglamo.wordpress.com/

Pariaman

Pariaman tadanga langang
Batabuik mangkonyo rami
Dunsanak tadanga sanang
Baok tompang badan kami

Ka ladang balilah sanduak
Dibali rang mudo-mudo
Digoyang mangko dikaruak
Dicaliak apo nan tibo, batanang manjago, sansai den, malang den

Oi di rantau tadanga sanang
Di kampuang marasai badan
Ndak do tampek ka batenggang
Sajak mati mandeh kanduang, anam puluah lapan, sansai den, malang den

Rumpuik saruik panjanglah baa
Panek pandan maladuangkan
Sakik iduik sananglah baa
Panek badan manangguangkan, ondeh diak kanduang oi …

Situjuah bandanyo dalam
Bakambuik pinang mudonyo
Bamulo kasiah mandalam
Digayuang suduik matonyo, sansai den, malang den

Oi lah masak nasi rang Kapau
Cubadak jo gulai tunjang
Tadanga adiak maimbau
Oi Uda lakehlah pulang, ampek puluah datang, kanduang den, lenyai den

Yo sinangi lauak rang Tiku
Diatua jo daun pandan
Manangih tagak di pintu
Malapeh uda bajalan, yo karantau urang …

Cari anam puluah satu
Usah sanak ragukan
Coretlah di kartu,
Ondeh lah Tuan oi, sansai den, malang den

Oi Samsudin jo Burhanudin
Salapiak sakatiduaran
Salapan duo bapilin
Ado lapan puluah lapan, ondeh lah Tuan oi, kanduang den, sansai den

Oi babuai adiak babuai
Babuai piciangkan mato
Kok dapek kato sasuai
Barisuak jalan baduo, ondeh diak kanduang oi…

Cari duo puluah duo
Kini angko nan tibo
Jan lengah manjago
Ondeh diak kanduang oi, sansai den, malang den

Oi ka ladang batanam padi
Ditanam anak Bintuangan
Lah malang nasib si Joki
Tatagak tiang gantuangan, sabaleh di tangan, sansai den, malang den

Oi Taratak gunuang Pasaman
Kurinci basimpang tigo
Taragak usah bapasan
Dalam mimpi kito basuo, ondeh diak kanduang oi …

Kamilau kacang kamilau
Kaduo kacang tantadu
Kok datang adiak nak manyilau
Jadi lautan kalam ulu, limo puluah satu, sansai den

Oi karambia satandan labek
Baminyak tangah kuali
Bapasan ka anak ketek
Uni ang suruah kamari, sansai den, malang den

(Ciptaan Masroel Mamudja, Dipopulerkan ulang oleh Young Patapayan)
©ourtesy of https://laguminanglamo.wordpress.com/


Translate to

Masukkan email anda pada kotak di bawah dan klik button 'Berlangganan'. Anda akan dikirimi email untuk setiap lirik lagu yang baru tayang

Join 270 other followers

badendang™

Dari Masa ke Masa


Lokasi Pengunjung

MARAWA

Dikunjungi

  • 7,059,070 orang

%d bloggers like this: